जो तो उठतो आणि...

दाभोळकर, पानसरे आणि कलबुर्गी... एका पाठोपाठ एक अ‍शा तीन विचारवंतांच्या हत्या झाल्या. आणि प्रत्येक वेळा संशयाची सुरी ‘सनातन’कडे वळली. अर्थात या प्रकरणांतील खरे आरोपी कोण याची अजून शहनिशा व्हायची आहे. पण त्याआधीच अनेकांनी ‘सनातन’वर बंदी घालायची मागणी लावून धरली आहे. कित्येकांना ‘सनातन’पासून त्यांच्या जीवाला धोका असल्याचा साक्षात्कार होऊ लागलाय.

सनातन म्हणजे ‘इसिस’च्या धर्तीवरील एखादी संस्था असावी, असेच एकंदर चित्र उभे करण्यात आलंय. इसिसमध्ये भरती होण्यासाठी जाणर्‍या तरुणांपेक्षा सनातनचा साधक समीर गायकवाड माध्यमांत जास्त गाजतोय. खरंच इतकी खतरनाक असेल सनातन संस्था, तर मग आज बंदीची मागणी करणारे स्वत: सत्तेत असताना गप्प का बसले होते? देशहिताच्या एवढ्या महत्त्वाच्या बाबीसाठी एवढा विलंब कशासाठी?

एकीकडे पोलिसांनी समीर गायकवाडचा उल्लेख ‘टफ नट टू क्रॅक’ असा केल्याच्या बातम्या येतात. त्याचा वकील सोबत असल्यामुळे पोलिसांना त्यांच्या खास पद्धतीने तपास करता येत नाही. त्यामुळे कारवाईला उशीर होतोय, असेही छापून येते. अर्थात अशा बातम्या एकंदरीत पोलिस तपासावरच प्रश्न चिन्ह उभे करतात. पोलिस तपास म्हणजे, ‘पोलिसी खाक्या दाखवून गुन्ह्याची कबुली घेणे नव्हे’ यावर अजुनही आमचा विश्वास आहे. असो.

तर सांगायचा मुद्दा असा की, जो तोंडच उघडत नाही. त्याच्या चौकशीतून अनेक गंभीर बाबी पुढे येत आहेत, हे मानायचे कसे? माध्यमांना अशा परस्पर विरोधी बातम्या कोण पुरवतंय? वागळेंच्या जीवाला धोका, हे पोलिसांनी अधिकृतपणे सांगितले आहे का? तसे असेल तर सगळ्याच माध्यमांनी तसं ठामपणे का सांगितले नाही? केवळ काही ठरावीक ठिकाणीच वागळेंनी पोलिस प्रोटेक्शन नाकारल्याची बातमी कशी? मुद्द्लात वागळेंना पोलिस प्रोटेक्शन दिलंच नव्हते तर त्यांनी ते नाकारलं तरी कसं? कोण अशा अ‍फवा पसरवतंय? आणि त्यामागची कारणं काय?

केवळ सनातन संस्थेला बदनाम करण्यासाठी हे सगळं चालले आहे का? सनातनला बदनाम करुन कोणाचा फायदा होणार आहे? का सनातनच्या आडून आज सत्तेत असलेल्या आणि हिंदुत्त्ववादी मानल्या जाणाऱ्या सरकारला बदनाम करण्याचे हे षडयंत्र आहे? की एकूणच हिंदू धर्म बदनाम करण्याचा हा डाव आहे?

प्रश्न अनेक आहेत. मात्र त्यांची उत्तरे देणारे कुणी दिसत नाही. शीना बोरा प्रकरणात जसे तत्कालीन पोलिस आयुक्त राकेश मारिया वारंवार समोर येऊन माहिती देत होते, तसेच आताही पोलिस किंवा सरकारच्या प्रतिनिधींनी समोर येऊन खात्रीशीर महिती द्यायला हवी. नाहीतर जो तो उठतो आणि स्वत:ची प्रसिद्धीची पोळी भाजून घेतो, असे चित्र कायम राहील.

सन २००८ साली मुंबईत झालेले स्फोट आणि २००९ साली मडगाव- गोवा येथे झालेले स्फोट यांचा सनातनशी संबंध जोडण्याचा कॉँग्रेसवाले प्रयत्न करत आहेत. मुळात या दोन्ही घटनांचा पोलिस तपास हा कॉँग्रेसच्या सत्तेच्या काळात करण्यात आला आहे. या तपासातूनच न्यायालयाने या दोन्ही घटनांमधील सनातन संस्थेचा कुठलाही संबंध नसल्याचे स्पष्ट केले आहे. असे असताना कॉँग्रेसचे नेते विखे पाटील आज कोणत्या आधारावर सनातनला आतंकवादी संघटना म्हणत आहेत.

- उन्मेष गुजराथी

सनातनपेक्षा आधी हिंस्र राजकीय पक्षांवर बंदी घाला !

सनातन उवाच : समीर गायकवाड निर्दोषच; सनातन संस्था त्याच्या पाठिशी ठाम!

राजकीय पाठिंब्याअभावीच सनातनची फरफट

(मुंबई) सनातन संस्था ही अध्यात्मिक क्षेत्रात कार्य करणारी संघटना आहे. ती कोणाचाही राजकीय पाठिंबा घेत नाही, व तशी आम्हाला अपेक्षाही नाही. मात्र केवळ पाठिंबा नाही, म्हणून तथाकथित पुरोगामी हे पोलिसांवर दबाव आणून आमच्या कार्यकर्त्यांवर कारवाई करायला भाग पाडतात, असा आरोप सनातन संस्थेचे प्रवक्ते संदीप शिंदे यांनी केला. मात्र त्याचवेळी समीर गायकवाड हा निर्दोष असून, संस्था त्याच्या पाठिशी ठाम उभी आहे, त्याचा पुनरुच्चारही शिंदे यांनी यावेळी केला.

विचारवंतांच्या हत्यांमुळे त्यांचे कुटुंबिय व चाहत्यांनी सरकार आणि पोलिसांवर आणलेला दबाव, हत्येकऱ्यांना केवळ हिंदुत्त्ववादी म्हणून सरकार पाठिशी घालण्याचा आरोप, मिडियाचा पोलिसांवर असणारा दबाव, यासंदर्भात विधानसभेत उठणारे तारांकित प्रश्न, या सर्व प्रकरणांना वैतागून सरकारने केवळ दिखावूपणासाठी समीर गायकवाडला संशयित म्हणून अटक केली, असा आरोपही शिंदे यांनी यावेळी केला.

समीरवरील आरोप अद्याप सिद्ध झाले नाहीत. पोलिसांवरील दबावतंत्रामुळे त्यांनी ही धरपकड केली असल्याचे सनातनने मुंबईत घेतलेल्या पत्रकार परिषदेत सांगितले. पुरोगाम्यांना सर्व हिंदूंना धर्मनिरपेक्ष बनवायचे आहे. पण त्यांच्याआड सनातन संस्था येत आहे. त्यामुळेच ते आमच्यावर बंदीची मागणी करीत आहेत, असे सनातनने यावेळी म्हटले. संस्थेचे प्रवक्ते अभय वर्तक, डॉ उदय धुरी आणि कायदेविषयक सल्लागार संजीव पुनाळेकर यावेळी उपस्थित होते.

पोलिसांवर हात उचलणाऱ्या रझा अकादमीवर बंदी का नाही? 

सनातन संस्थेवर बंदी घालण्याची मागणी करणारे जितेंद्र आव्हाड, शाम मानव आणि दाभोलकर कुटुंबीय त्यावेळी कुठे होते? असा सवाल देखील सनातन संस्थेने केला आहे. जेव्हा रझा अकादमीच्या लोकांनी पोलिसांवर हात उचलला होता. देशात काहीही झाले तर थेट सनातनकडे बोट दाखवले जात आहे. सनातनने हिंदू जनजागृती केली. देशाभिमानासाठी काम केले. मात्र, पुरोगाम्यांना हे बघवत नसल्याचे सनातनने म्हटले आहे. तसेच देशातील तपास यंत्रणा या स्वत:ला पुरोगामी समजणाऱ्या लोकांच्या हातातील बाहुले झाल्याचा आरोपही यावेळी सनातनने केला. अंधश्रद्धा निर्मुलन समितीचे अध्यक्ष नरेंद्र दाभोलकर हत्याप्रकरणात मनीष नागोरी आणि विकास खंडेलवाल याला अटक केली. त्यावेळीही सनातनवर आरोप झाले. मात्र, त्यांचे पुढे काय झाले? असा सवाल देखील सनातनने केला. हिंदु विधीज्ञ परिषदेचे राष्ट्रीय सचिव संजीव पुनाळेकर म्हणाले, आम्ही या संदर्भात तथाकथित पुरोगाम्यांच्या षडयंत्राला बळी न पडता निष्पक्षपणे तपास होण्यासाठी मुख्यमंत्र्यांकडे मागण्याही केल्या आहेत.

सनातनपेक्षा आधी हिंस्र राजकीय पक्षांवर बंदी घाला !

पानसरे हत्येप्रकरणी काँग्रेस, राष्ट्रवादी काँग्रेस, कम्युनिस्ट पक्ष, रिपब्लीकन पक्ष आदी राजकीय विचारसरणीच्या लोकांनी सनातनवर बंदीची मागणी केली आहे. सनातनच्या एका साधकाला संशयित म्हणून अटक झाली; म्हणून सनातनवर बंदी घालण्याची मागणी होत असेल, तर प्रथम

1. राष्ट्रवादी काँग्रेसचे नेते पद्मसिंह पाटील यांच्यावर खुनाचा गुन्हा सिद्ध झाला आहे; म्हणून राष्ट्रवादी काँग्रेसवर बंदी घालावी.

2. शीखविरोधी दंगली घडवून सहस्त्रावधी निरपराध शिखांची कत्तल केल्याबद्दल काँग्रेस पक्षावर बंदी घालावी.

3. केरळमध्ये 250 स्वयंसेवकांची हत्या राजकीय कारणांसाठी केल्याची स्वीकृती देणाऱ्या एम. मणी यांच्या मार्क्सवादी कम्युनिस्ट पक्षावर बंदी घालावी. 

4. अंनिसचे नक्षलवाद्यांशी संबंध असल्याचे सिद्ध झाले असल्यामुळे त्यांच्यावर बंदी घालावी. 

असा स्वतःचा खुनी इतिहास ज्ञात नसलेल्या राजकीय पक्षांनी सनातन संस्थेवर बंदी घालण्याची मागणी करणे, हे हास्यास्पद आणि लज्जास्पद आहे. म्हणून सनातनपेक्षा आधी हिंस्र राजकीय पक्षांवर बंदी घालावी, अशी 'सनातन'ची मागणी आहे.

सनातन संस्था ही कोणत्याही राजकीय पक्षाशी संबंधित नसल्याने, पुरोगाम्यांच्या दबावामुळे पोलीस सहजपणे संस्थेवर सातत्याने कारवाई करत आहेत. आम्हाला राजकीय वरदहस्ताची आवश्यकता नाही, आम्ही सत्याच्या बाजूने आहोत, त्यामुळे ‘सत्यमेव जयते’च होईल !

- सनातन प्रवक्ता संदीप शिंदे

सनातनने मुख्यमंत्यां  कडे केलेल्या मागण्या: 

दाभोलकर-पानसरे प्रकरणात पुरोगाम्यांची एकांगी विचारसरणी लक्षात घेता त्यांच्या दबावाला बळी न पडता स्वतंत्रपणे तपास करावा आणि या हत्यांचे, सर्व पैलू तपासण्यात कसलीही कसर राहू नये, असे आदेश द्यावेत.

तपासाच्या दृष्टीने दाभोलकर-पानसरे कुटुंबीयांच्या सूचनांवर कार्यवाही व्हावी; मात्र तपासदलाचे अनधिकृत नेतृत्व त्यांच्यावर सोपवण्याची चूक टाळावी. अन्यथा तपास भरकटून निष्पाप व्यक्तींना त्रास सहन करावा लागेल.

सनातन संस्थेला लक्ष्य करून आरोप करणाऱ्या काही व्यक्ती आणि संघटना यांची प्रवृत्ती अत्यंत संशयास्पद वाटते. तसेच सनातन संस्थेने त्यांचे आर्थिक घोटाळे उघड केले असल्यामुळे काही निष्कर्षांपर्यंत तपास यंत्रणा पोहोचू नयेत, या धडपडीतून सनातनला लक्ष्य केले जात आहे का, याचीही सखोल चौकशी व्हावी.

श्याम मानव यांची तपासकामातील लुडबुड थांबवावी आणि ते ज्या पद्धतीने मुख्यमंत्र्यांशी असलेल्या वैयक्तिक संबंधांचा उल्लेख करून स्वतःची शेखी मिरवत आहेत. त्यास आळा घालावा. 

सनातन संस्था ही आध्यात्मिक आणि राष्ट्रभक्त संघटना असून, कोणताही निष्कर्ष समोर आलेला नसतांना पुरोगाम्यांच्या बेछूट आरोपांमुळे संस्थेची नाहक बदनामी होत आहे. संस्थेने अनेक मंदिरांतील घोटाळे बाहेर काढण्यासह, पर्यावरण रक्षण, तसेच राष्ट्रध्वजाचा अवमान रोखण्याच्या संदर्भात विविध जनजागृती चळवळी शिस्तबद्धरीत्या राबवून, राष्ट्रीय स्तरावर कार्य उभे केले आहे. त्याला रोखण्याचे षड्यंत्रच या तथाकथित पुरोगाम्यांनी आखलेले दिसते. सनातन संस्था या आरोपांच्या वादळातून निश्चित तरून निघेल आणि समाजात राष्ट्रभक्ती रुजवण्याच्या कामी अधिक जोमाने कार्यरत होईल, याचा आम्हाला विश्वास आहे. या वेळी उपस्थित हिंदू गोवंश रक्षा समिती, राजश्री शिवबा विचार प्रसारक मंडळ, श्री महाराष्ट्र रामलीला मंडळ या हिंदुत्ववादी संघटनांनीही सनातन संस्थेला जाहीर पाठिंबा दिला आणि हिंदुत्ववादी संघटनांवरील मानहानीच्या विरोधात संघटितपणे उभे रहाण्याचा मानस व्यक्त केला. 

– अभय वर्तक, सनातन संस्था, प्रवक्ते  

व्यक्तिगत प्रसिध्दीसाठी सनातनवर आरोप केले जात आहेत. समीर हा निर्दोष आहेच पण एका कार्यकर्त्याला अटक झाली म्हणून संपूर्ण संस्थेला फाशी देणे योग्य नाही. तपासयंत्रणांनी पुरोगाम्यांच्या दबावाखाली ही कारवाई केल्याचा आरोप सनातनने केला. दाभोलकर, पानसरे हत्याप्रकरणात आम्ही तपास यंत्रणांना सहकार्य केलं आहे. तपास यंत्रणांना आम्ही महत्वाची माहिती दिली आहे. मात्र त्याकडे दुर्लक्ष केले, असा दावाही सनातनने केला.

- उन्मेष गुजराथी

समीर गायकवाड : आरोप आणि उठाठेव

समीर गायकवाडला अटक झाल्याची बातमी सगळ्यांनी रंगवून दिली. पण सनातनची बाजू कोण मांडणार? मी तसे करून पाहिले. आणि आज दिवसभर माझा फोन वाजत राहिला. मी सनातनचा साधक झालोय की काय अशी शंकाही कित्येकांना आली. पण असे काहीही झालेले नाही आणि यापुढेही होणार नाही याची खात्री असू द्या. 

पण तरीही पत्रकार म्हणून दोन्ही बाजू मांडणे मी माझे कर्तव्यच समजतो. त्यातली एक बाजू सगळ्यांनीच इतकी उचलून धरलीय, की त्यात आता नवीन सांगण्यासारखे काहीच नाही. म्हणूनच मी दुसऱ्या अ(ल्प)प्रकाशित बातमीला पुढे आणायचे ठरवले. 

गुन्हा सिद्ध होत नाही तोपर्यंत संबंधित व्यक्तीला निर्दोषच समजले जाते. पण आजकाल 'मिडिया ट्रायल'च्या नावाखाली व्यक्तीचा हा अधिकारच हिरावून घेतला जातोय. एकाच बाजूने बातमी रंगवून, आणि त्याचाच भडीमार केला जातोय. 

आता आजचेच उदाहरण घ्या. त्या समीर गायकवाडच्या घरात २३ मोबाईल, एक धारधार चाकू, सनातनचे प्रचार साहित्य सापडले. पण याचा कॉ. पानसरेंच्या हत्येशी काही संबंध सिद्ध झालाय का? 

मोबाईल म्हणजे बंदुका सापडल्या अशा थाटात आज सगळीकडे बातम्या देताहेत. अरे, मोबाईल दुरुस्तीचा व्यवसाय करणाऱ्याकडे मोबाईल नाही तर काय मिसाईल सापडणार? 

एखाद्याची फुकट बदनामी करायची म्हणजे तरी किती? म्हणे घरात एक धारदार चाकू सापडला? कुणाच्या घरात नसतो चाकू? आणि चाकूला धार असतेच. त्या चाकूने हत्या केलीय का त्याने? 

सनातनच्या पूर्णवेळ साधकाकडे, सनातनच्या प्रचाराचे साहित्य नाहीतर काय बायबल आणि कुराण सापडणार ?

मग या रंगतदार बातम्या नक्की कशासाठी? आरोपी नक्की कोण हा मुद्दा नाहीच. जो असेल त्याला शिक्षा ही व्हावीच. पण ही उथळ उठाठेव नक्की कोणाच्या फायद्याची, याचाही विचार नको का करायला?

- उन्मेष गुजराथी

समीर गायकवाड बळीचा बकरा ?

कोल्हापूर येथील कॉ. गोविंद पानसरे यांच्या हत्येच्या प्रकरणी पोलिसांनी अटक केलेला समीर गायकवाड हा ‘सनातन’चाच पूर्णवेळ साधक असून तो निष्पाप अन् निर्दोष आहे, याचा वारंवार पुनरुच्चार सनातन संस्थेने विविध प्रसिद्धी माध्यमांतून केला आहे. यापूर्वीही डॉ. नरेंद्र दाभोळकर यांच्या हत्येप्रकरणी सनातन संस्थेच्या साधकांची चौकशी झाली. त्यांना नाहक बदनाम करण्याचे षडयंत्र करण्यात आले. मात्र यातून अद्याप काहीही निष्पन्न न झाल्यामुळे केवळ सनातन संस्थेमध्येच नव्हे तर संबंध हिंदुत्ववाद्यांमध्ये संतापाची लाट उसळली आहे. पोलिसांनी 2 कोटी कॉल रेकॉर्ड्सवरून सनातनच्या साधकाचाच क्रमांक शोधून त्याला हेतूपूर्वक अटक केली असल्याचा आरोपही संस्थेने केला आहे.

याप्रकरणाची निष्पक्ष चौकशी करावी अशी मागणी करीत सरकारच्या 'चोर सोडून संन्याशाला फाशी' या प्रवृत्तीचा सर्वच हिंदुत्ववादी संघटनांनी निषेध व्यक्त केला आहे. आपल्या या आरोपात संस्थेनेपुढे असे म्हटले की,  यापूर्वीही डॉ. दाभोलकर यांच्या हत्येच्या प्रकरणी सनातनच्या अनेक साधकांची चौकशी झाली होती. सनातनला यापूर्वीही अनेकवेळा झोडपण्यात आले आहे; परंतु त्यातून काहीही निष्पन्न झाले नाही.

समीर गायकवाड यांना संशयावरून अटक करण्यात आली आहे. पोलीसही त्यांना संशयित असल्याचे म्हणत आहेत. लवकरच यामागील सत्य उघडकीस येईल. सनातनही आध्यात्मिक संस्था असल्याने ती प्रत्यक्ष कायदेशीर साहाय्य करू शकत नाही. समीर गायकवाड हे निष्पाप असल्याने त्यांना हिंदु विधीज्ञ परिषद किंवा अन्य हितचिंतक अधिवक्ता यांच्यामार्फत कायदेशीर साहाय्य पुरवण्यात येईल, अशी माहिती अॅड. संजीव पुनाळेकर यांनी दिली.

अटक संशयास्पदच

निष्पाप समीर गायकवाड याला गोवण्यासाठी पोलिसांनी बनाव रचला आहे. पोलिसांनी अशी थेट अटक करणे संशयास्पद आहे. एखाद्याला 24 तास चौकशी किंवा पडताळणी केल्यानंतर त्यांना पुढील 24 तासांत न्यायालयात हजर करायचे असते. त्यासाठी पोलिसांना काही तास बसून रिमांड कागदपत्रे बनवावी लागतात. येथे पहाटे अटक करून लगेच पोलिसांनी न्यायालयात हजर केले. याचाच अर्थ कागदपत्रे आधीच बनवण्यात आली होती. हा संपूर्ण बनाव आहे, हे यातून स्पष्ट होते. अटक झाल्यानंतर त्यांच्या परिवाराला कळवायचे असते. पोलिसांनी अटक केल्यानंतर काही तासांनी आई-वडिलांना कळवले, हे गंभीर आणि पोलिसांच्या कार्यपद्धतीविषयी प्रश्नचिन्ह निर्माण करणारे आहे.

समीरसह त्याचे संपूर्ण कुटुंब आमचे साधक - सनातन

समीरच नव्हे तर त्याचे संपूर्ण कुटुंब आमचे साधक असून, त्याच्यावरील सर्व आरोप बिनबुडाचे असल्याचे सनातनने म्हटले आहे. शिवाय समीरचे निर्दोशित्व सिद्ध करण्यासाठी गायकवाड कुटुंबाला कायदेशीर मदत करणार असल्याचेही संघटनेकडून सांगण्यात आले.

अशी घडली होती घटना

 15 फेब्रुवारीला सकाळी आठच्या सुमारास गोविंद पानसरे यांच्यावर कोल्हापुरातील सागरमळा भागातील राहत्या घराजवळ हल्ला झाला होता. उपचारादरम्यान त्यांचे निधन झाले. गोविंद पानसरे आणि त्यांच्या पत्नी उमा नेहमीप्रमाणे शिवाजी विद्यापीठ परिसरातून मॉर्निंग वॉकवरुन परतत असताना, दुचाकीवरुन आलेल्या दोन अज्ञात हल्लेखोरांनी पानसरे आणि त्यांच्या पत्नींवर गोळ्या झाडल्या. हल्लेखोरांनी एकूण तीन गोळया झाडल्या होत्या. त्यातील एक गोळी पानसरे यांच्या मानेला लागली. एक गोळी त्यांच्या हाताला चाटून गेली. उमा पानसरे यांनाही एक गोळी लागली होती. मात्र, त्यांचे प्राण वाचले.

समीरला सात दिवसांचा पीसीआर

इतिहास संशोधक कॉम्रेड गोविंद पानसरे यांच्या खून प्रकरणी पोलिसांनी दोन कोटी फोन कॉल्स तपासून सांगलीतून समीर गायकवाड याला बुधवारी सकाळी 4 वाजता अटक केली. न्यायालयाने त्याला सात दिवसांचा पीसीआर ठोठावला असून, समीर गायकवाड हा सनातन संस्थेचा पूर्णवेळ कार्यकर्ता आहे. 

संजय कुमार, पोलिस महानिरीक्षक

 (कोल्हापूर परिक्षेत्र)

कोण आहे हा समीर गायकवाड ?

32 वर्षांचा समीर विष्णू गायकवाड हा सांगलीच्या शंभर फुटी रोडवरील मोतीचौक परिसरात राहत होता. गायकवाड 1998 पासून सनातन संस्थेत पूर्णवेळ काम करतो. मोबाईल रिपेअरिंगचे काम करणारा समीर गायकवाड हा मुंबईत सनातन संस्थेचा ‘धर्मरथ’ चालवायचे काम करत होता. इतकंच नाही तर त्याचं संपूर्ण कुटुंब सनातन संस्थेशी संबंधित आहे. 

त्याची पत्नी सध्या गोव्यातल्या आश्रमात राहत आहे. कॉम्रेड गोविंद पानसरेंच्या हत्या प्रकरणात संशयित म्हणून गायकवाडला अटक करण्यात आल्यानंतर त्याच्या सांगलीच्या घरी पोलिसांनी छापा मारला आहे. पानसरे यांच्या हत्येत प्रत्यक्ष-अप्रत्यक्ष गायकवाडचा संबंध असू शकतो, असा पोलिसांना संशय आहे. या अटकेमुळे या हत्याप्रकरणात महत्त्वाचे धागेदोरे हाती लागलेत असा विश्वास पोलिसांना आहे. गायकवाडची झाडाझडती सुरू असून यासंबंधी सांगली, मुंबई, नवी मुंबईत तपास करणार असल्याचे पोलिसांनी म्हटले आहे.

- उन्मेष गुजराथी