Turn off for: Marathi
होय, अर्ध्या चड्डीतच!
1 लाखांहून अधिक स्वयंसेवक पुण्यात
संघाचे ‘शिवशक्ती संगम’
3 जानेवारीला एकदिवसीय महाशिबीर
मुंबई : केवळ हिंदुस्थानातीलच नव्हे तर जगातील हिंदुत्त्वद्वेष्ट्यांच्या नाकावर टिच्चून, ‘राममंदीर वही बनायेंगे’चा नारा लगावत आजपासूनच 1 लाखांहून अधिक स्वयंसेवक पुण्यातील ऐतिहासिक महाशिबीरासाठी दाखल होत आहेत. पुण्यात 3 जानेवारीला होणारे ‘शिवशक्ती संगम’ हे ऐतिहासिक आहे . या महाशिबिरासाठी अडीच वषार्ंपासून संपर्क करणे, कार्यक्रमाची आखणी करणे आदी कामे सुरु आहेत. पुणे शहरापासून 20 किलोमीटर अंतरावर ‘सायबर सिटी’ हिंजवडी औद्योगिक नगरीच्या पलिकडे 5 किलोमीटर अंतरावर मारुंजी या गावी हे शिबीर होणार आहे. त्यालाच ‘शिवशक्ती संगम’ असे नाव दिले आहे. त्यासाठी साडेचारशे एकर जागा निश्चित केली आहे. त्यातील प्रत्यक्ष जेथे स्वयंसेवक गणवेशात उभे राहणार, ते कवायतीचे प्रांगण शंभर एकराचे आहे. संरसंघचालक मोहन भागवत यांचे भाषण हे स्वयंसेवकांसाठी महत्त्वाचे ठरणार आहे. राममंदीरच्या महत्त्वाच्या पण वादग्रस्त वक्तव्यानंतर पुन्हा एकदा भागवत कोणत्या नव्या मुद्यावर बोलणार आहेत, याकडे सर्वच स्वयंसेवकांसह जगातील प्रसारमाध्यमांचे लक्ष लागले आहे.
केंद्रात व महाराष्ट्रात संघप्रणित भाजपाचे सरकार आल्यानंतर इतक्या मोठ्या प्रमाणात प्रथमच अशा प्रकारचे शिबीर होत असल्यामुळे हिंदुस्थानातील सर्वच राजकीय दिग्गजही या महाशिबीराकडे नजर लावून आहेत.
पश्‍चिम महाराष्ट्र प्रांत हा प्रशासकीयदृष्ट्या 7 जिल्ह्यांचा मिळून बनलेला आहे. यात पुणे, नगर, सोलापूर, सातारा, कोल्हापूर, सांगली, नाशिक असणारा महाराष्ट्राचा भाग समाविष्ट आहे. केवळ याच भागातील स्वयंसेवक यावेळी येथे उपस्थित राहणार आहेत. या संाघिकाच्या निमित्ताने संघ रचनेतील पश्‍चिम महाराष्ट्र प्रांताचे जुने-नवे, कामात असणारे - कामापासून काही निमित्ताने दूर गेलेले, शिवाय संघकार्यात नवीन सामील होऊ पाहणारे असे सर्व स्वयंसेवक एकत्र येणार आहेत.
अशी केली नोंदणी
एक लाखांहून अधिक स्वयंसेवकांची नोंदणी ही 1 ऑगस्ट 2015 पासून सुरु झाली. यात 2 टप्पे आखण्यात आले. पहिल्या टप्प्यात संघ कार्यात सध्या कार्यरत असणार्‍या सर्व स्वयंसेवकांची नांदणी केली गेली. हा टप्पा 15 सप्टेंबरपर्यंत पूर्ण करण्यात आला. या टप्प्यात 45, 474 स्वयंसेवकांची नोंदणी पूर्ण झाली.
नोंदणीच्या दुसर्‍या टप्प्यात प्रत्यक्ष स्वरुपात संघकार्यात कार्यरत नसणार्‍या स्वयंसेवकांची नोंदणी झाली. यासाठी संघपरिवारातील इतर संघटनांबरोबर काम करणार्‍या स्वयंसेवकांच्या भेटी घेवून त्यांचे नोंदणी अर्ज भरुन घेण्यात आले. ज्या भागात संघाचे काम सध्या चालू नाही, अशा ठिकाणी छोट्या स्वरुपात संघ परिचय वर्ग घेण्यात आले. या माध्यमातून संघकार्याची माहिती दिली जात होती. अशा तर्‍हेने 1 लाखांहून अधिक स्वयंसेवकांची पूर्वनोंदणी यशस्वीरित्या पूर्ण झाली.
नोंदणीची नेमकी पद्धत कोणती?
नोंदणी संगणकीय माध्यमातून करण्याचे ठरविले होते. मात्र सुरक्षिततेच्या दृष्टीकोनातून प्रत्येकाला वैयक्तिक स्वरुपात संगणकीय नोंदणी करण्याचा अधिकार देणे योग्य नव्हते. त्यामुळे पारंपरिक व संगणकीय या दोन्ही पद्धतीचा उपयोग केला गेला. स्थानिक पातळीवर फॉर्म कागदी स्वरुपात भरुन घेतले गेले व तालुका स्तरावर त्याची संगणकीय नोंदणी केली गेली.
नोंदणी फॉर्मवरील तपशील
भविष्यातील कार्यात सहभाग करुन घेण्यासाठी लागणारी सर्व माहिती गोळा करण्याचे पूर्वबैठकीत ठरले. त्यानुसार नाव, पत्ता, संपर्क (मोबाईल व इ-मेल), वय, शिक्षण, नोकरी, व्यवसायाबद्दलची माहिती, रक्तगट इ. तसेच शिवशक्ती संगमच्या नियोजनासाठी आवश्यक असणारी माहितीदेखील गोळा केली गेली. यात संघशिक्षण, दायित्व, संघ भौगोलिक रचनेतील वास्तव्य ठिकाणी, गणवेश, सद्यस्थिती वगैरे माहिती गोळा करण्यात आली. संघ कार्य पद्धतीमध्ये संघाच्या कुठल्याही कार्याचा खर्च संघ स्वयंसेवक उचलतो. त्यामुळे यासाठी येणार्‍या प्रत्येकाने किमान 50 रुपये आगावू भरुन नोंदणी केली. ही नोंदणी केल्यानंतर त्या नोंदणीकृत स्वयंसेवकाला त्वरीत एसएमएस व इ-मेल करुन कन्फर्मेशन देण्यात आले. नोंदणीमध्ये केलेली माहिती सर्वांना मोबाईलवरुन पाहता येईल, अशी सोय करण्यात आली.
व्यासपीठावरील दृष्य दिसण्यासाठी डिजीटल पडद्यांची सोय
तातडीच्या मदतीसाठी 20 रुग्णवाहिकांची व्यवस्था
सर्व कार्यक्रमासाठी स्वतंत्र विमा संरक्षण व्यवस्था
नोंदणीशिवाय स्वयंसेवकांना संघस्थानी प्रवेश निषिद्ध
स्वयंसेवकांना परतीच्या प्रवासासाठी शिदोरीची व्यवस्था
70 किमी लांबीची मैदानावरील आखणी
3.5 किमी लांब धावती कणात
मातृशक्तीसाठी स्वतंत्र सिद्धता केंद्र
अद्ययावत सुरक्षा यंत्रणा
सर्व महिला व पुरुष यांच्यासाठी स्वतंत्र स्वच्छतागृहाची सोय
राष्ट्रीय स्वयंसेवक संघाचे असे शिबीर यापूर्वीही तब्बल 32 वर्षांपूर्वी म्हणजेच 1983 मध्ये पुणे येथे तळजाई टेकडीवर झाले होते. त्यावेळी 35 हजार स्वयंसेवक उपस्थित होते. यंदाच्या शिबीरासाठी असणार्‍या 1 लाख स्वयंसेवकांची पूर्वनोंदणी जवळपास पूर्ण झाली आहे. यातून युवा शक्तीच्या राष्ट्रभक्तीचे ज्वलंत स्वरुप शिवशक्ती संगमावर प्रकट होणार आहे.
- मोहन भागवत, सरसंघचालक , आरएसएस
शिवशक्ती संगमातील महत्त्वाच्या 11 गोष्टी
1,00,000 गणवेषधारी स्वयंसेवक
450 एकरचे प्रत्यक्ष संघस्थान
150 एकरवर सिद्धता केंद्र
200 एकरचे वाहनतळ
70 फूटीचा ध्वजस्तंभ
80 फूट उंचीचे व्यासपीठ
2000 स्वयंसेवकांचा सहभाग असलेले घोषपथक
7 जिल्ह्यांतील स्वयंसेवकांचे एकत्रिकरण
8000 कायमस्वरुपी कार्यरत स्वयंसेवक
13 किल्ल्यांच्या प्रतिकृतींची प्रवेशव्दारे
50,000 नागरिकांची बसण्याची व्यवस्था
- उन्मेष गुजराथी
